وصلنا أمس الفجر خبر إن سانتا نزل تراك جديد و دخلنا نسمعه و احنا متوقعين إننا هنلاقي منه مستوى عالي كالعادة و قد كان
لو هتتكلم عن الرابرز بشكل عام فَ طبيعي إنك تلاقي رابرز كتير مهتمين بقوة الليركس و القوافي و الديليڤيري و ما إلى ذلك مش حاجة غريبة يعني و لكن صفوة الرابرز ف مصر لازم هتلاقي عند كل واحد منهم سلاح سري بيميزه عن غيره
نرجع لأساس موضوعنا تاني و هو السلاح الخاص بالرابر أحمد سانتا
أحمد سانتا بيقدم Knowledge (معرفة) .. هنضيّق الإطار شوية و نحددلك نوع المعرفة بإنها “معرفة رياضية” و بالأخص عن كرة القدم
المعرفة بتتقاس ازاي طيب ؟!
الموضوع سهل و بسيط و إجابته هي الReferences أو الإشارات
إشارة يعني انت بتُشير ل اسم معين (اسم شخص أو مكان أو حدَث) ف بتكون اديت المستمع فكرة عنه و بالتالي زودت من ثقافته ف المجال المعرفي اللي انت بتقدمهوله
الإشارات دي بيتم وضعها داخل الأفكار الخاصة بالتشبيهات / البانش لاينز / الوورد بلاي .. مع اختيار الصيغة القوية و الممتعة ليها بالطبع
دي واحدة من أهم قواعد الemceeing
و نقطة إضافية إن سانتا بيقدملك جزء من شخصيته فَ هو خدَم بشكل كبير الفكرة السائدة “الراب شخصية”
مستحيل تسمع كذا تراك لسانتا بشكل متعاقب و متقدرش تستنتج إنه من أشد المعجبين بكرة القدم
هنستعرض بعض الإشارات اللي وردت ف التراك الأخير “النمر الأسود”:
- مركز Word Player
- أوليڤر كان ف السيكس يارض و أنا الظاهرة جاي أخلّص
- روما توتي
- ف نص القلب زي كانتي
- رونالدينيو بالكباري تشد كولا
الوورد بلاي الفكاهي .. و ده جانب آخر من جوانب السلاح السري
ف الحقيقة احنا كنا هنحدد إن سانتا بيستعمل نوع الHomophone و لكن الموضوع أصبح محير لإننا اكتشفنا إنه بيستعمل برضه نوع الDouble Meaning بنفس الكثافة تقريباً خلال التراك الواحد
(لمعلومات أكتر اقرا أول كومنت)
استعراض لأهم الوورد بلايز ف التراك: - ماسكتش رقم واحد Master Coach
- واخد الكدر بالألولو
- شعرك سكران يا بوب شفيق ع الاسبونچا
- المواد تزدحم و أكتب دستور
- تتشوكي لو هتشكي
- تقولي Good أقولك Goods
مع الملاحظة الدقيقة هتكتشف إن سانتا بيحاول يتحدى نفسه ف إنه يستكشف ازاي الكلمة الصعبة أو الغير تقليدية تقدر تطلّع منها وورد بلاي و ده ف حد ذاته بيديك دليل على كُتر التدريب و الممارسة و بذل مجهود ف الكتابة
و الجانب ده بيساعده بشكل أكبر ف صناعة ليركس باتل مايلة للسخرية من الخصم أكتر من إنها عنيفة و دموية و دي واحدة من الثورات الأخيرة اللي حصلت ف تاريخ الراب المصري و بتنأى عن طابع الهاردكور اللي كان طاغي ع السين من بداية وجوده لحد بداية ظهور المدرسة الجديدة
و من الجدير بالذكر إن الستايل ده مبيعملوش غير قلائل ف مصر و الأجدر بالذكر إن سانتا وصل فيه لمرحلة الإتقان بدون شك
ده كان سلاح سانتا السري و إن شاء الله هنتكلم عن أسلحة سرية أكتر مع تراكات قادمة لرابرز مختلفة ف انتظرونا
أي سؤال أو إضافة الكومنتات هترحب بيك
بيس
