الفلو ف علم الراب ليه بعض الخصائص و الأبعاد المهمة اللي لازم الجمهور يكون فاهمها عشان يعرف يقيّم فلوهات الرابرز المختلفة
قبل ما نتطرق للشرح و التحليل…
السلاح السري النهاردة هيكون للرابر موسكو
و الشرح و التحليل هيكون كالتالي:
البار الموسيقي ليه مساحة معينة بتمتد من أول طبلة كيك لآخر طبلة سنير (أو ما يوازيهم) .. المساحة دي هي اللي انت بتكتب فيها الليركس الخاصة بكل بار و بتقسّمها بالطريقة اللي تريحك و بكده هيطلع ليك فلو مميز خاص بيك لوحدك
تخيل معايا المثالين الافتراضيين دول:
اااااااااااا ااااااااااا اااااااااااااااااااا
كيك سنير كيك سنير
اااااااااااا ااااااااااا ااااااا اااااااا
كيك سنير كيك سنير
دول كده بارين مختلفين بفلوهين مختلفين عشان زي مانت شايف تقسيمة الليركس (اااااااا) مختلفة ف كل مثال منهم
هتلاحظ ف المثالين دول إن فيه بعض الفراغات ما بين الليركس و دي بيكون اسمها “استراحة” بمعنى إن الرابر إما بياخد نفَسه أو بيسكت عشان يفصل بين جملتين أو هو ليه نظرة ف صناعة الفلو أياً يكن
اللطيف ف موسكو و اللي كان ظاهر ف تراك واحد بالظبط هو الفلو الانسيابي و اللي بيتقال عليه بالإنجليزية “Smooth Flow” .. ده بتتم صناعته عن طريق عدم وضع أي استراحات ف أي مكان خلال البار ف بيحصل التصاق للبارات كلها بشكل تسلسلي و بتصنع فلو انسيابي ممتع للودان
أهم حاجة إننا عرفنا من ده كله إن الفلو ممكن يترسم ع الورق مش مجرد يتسمع فقط و الرابر الشاطر هو اللي بيكتب ع البيت و بيعرف يرسم أفضل فلو ممكن ده غير لجوءه للنقطة التانية و اللي هنوضحها حالاً و هي مبدأ توافق المقاطع الصوتية ف النطق
عليك ك رابر إنك أثناء الكتابة تحاول تختار الكلمات اللي هتتناسب مع بعض و ممكن نطقها ورا بعض بطريقة سهلة
ده مثال سهل:
“شبابكوا فاضية فشخ دايرة للبشر بتغل”
مثال صعب:
“عملت تاسك حاطط ماسك ايلون ماسك”
هتلاحظ الفرق ما بين المثالين إن الأول فيه سهولة ف وصل الكلمات ببعض و بالتالي هيبقى فيه انسيابية أكبر ف نطقها بعكس المثال التاني حصل فيه إن التقاء بعض الحروف مع بعض مكنش بالسهولة المناسبة و ده اللي ف أغلب الأحيان بيسبب مشاكل ف صناعة الفلو
ف بالتالي الفلو بيعتمد بشكل أساسي ع الكتابة و اختيار الكلمات المناسبة
اللي بيميز موسكو ف النقطة دي إن ده مش فاست فلو إن انت مش بتجري بالليركس ع البيت ده فلو معتدل انت بتحاول تظبطه مع نفسك بالكتابة و الأداء فعشان تطلعه بالإتقان ده هيحتاج مهارة أكبر
ف الختام هحط مثالين للتأكيد عشان تعرف تفرّق بيهم ما بين الفلوهات الإنسيابية و الفلوهات المتقطعة و اللي بيتخللها استراحات
موسكو:
“بقلبلك الصليب فتنوح هالالويا لوّح
انت بيننا نص لبة ازميلي ف الضهور بتشوّح
مش بننسى كان بداية صاحبي و الدماغ تسوّح
هاتلي فلوس كليب أعمله متقوليش اعمل و تشوّح”
قداس
هوك:
” هنصور قتيل خد الصورة دي
كلم المقطورة تشيل ع المنصورة ارميه
…هرجعك للسين هعمل فيك جميل
تسمّعهم القديم تعمل ضحك يجيب صريخ”
مدد
الكلام المذكور هنا تقدر تطبقه على تراك “قداس”
موسكو طالما قادر يعمل ده فيظل ده سلاح موجود عنده حتى لو مكنش حابب يستخدمه بشكل متكرر من باب التنوع
بيس
Writin by : Mostafa A. Fox
